Xi anatoa wito wa kuunganisha hekima ili kubuni Mpango wa Miaka Mitano

Rais Xi Jinping amesisitiza umuhimu wa kuimarisha muundo wa hali ya juu na kuunganisha hekima kutoka kwa umma katika kubuni mpango wa maendeleo wa China kati ya 2021 na 2025.

Katika maagizo yaliyochapishwa siku ya Alhamisi, Xi alisema nchi lazima iwatie moyo umma kwa ujumla na sekta zote za jamii kutoa ushauri kuhusu Mpango wa 14 wa Miaka Mitano wa nchi (2021-25).

Utayarishaji wa mpango huo ni njia muhimu ya utawala kwa Chama cha Kikomunisti cha China, alisema Xi, ambaye pia ni katibu mkuu wa Kamati Kuu ya CPC na mwenyekiti wa Tume Kuu ya Kijeshi.

Amezitaka idara husika kufungua milango na kutoa maoni yote yenye manufaa katika kubuni mpango huo unaohusu nyanja mbalimbali za maendeleo ya kijamii na kiuchumi na unaohusishwa kwa kiasi kikubwa na maisha ya kila siku na kazi za wananchi.

Ni muhimu kufyonza kikamilifu matarajio ya jamii, hekima ya watu, maoni ya wataalam na uzoefu katika ngazi za chini katika mpango huo huku tukifanya juhudi za pamoja wakati wa utayarishaji wake, alisema.

Mpango huo utajadiliwa katika Kikao cha Tano cha Mjadala wa Kamati Kuu ya 19 ya CPC mwezi Oktoba kabla ya kuwasilishwa kwa Bunge la Kitaifa la Wananchi ili kuidhinishwa mwaka ujao.

Nchi hiyo tayari imeanza kazi ya kubuni mpango huo mnamo Novemba wakati Waziri Mkuu Li Keqiang alipoongoza mkutano maalum kuhusu mpango huo.

China imekuwa ikitumia mipango ya miaka mitano kuongoza maendeleo yake ya kijamii na kiuchumi tangu mwaka 1953, na mpango huo pia unajumuisha shabaha za mazingira na malengo ya ustawi wa jamii.